Episode: Nais foon diling 15.03.2012
Podcast: Nais foon diling
Veröffentlicht: vor 2 Jahren, am 15.03.2012 um 07:54
Dateigröße: 3.02 MB
Link: Webseite zu dieser Episode
Download: Datei herunterladen
Beschreibung: törsdi, di 15ste önj e uursmoune Kil Da ministerpräsidente foon e nordtjüsche lönje drååwe jam diling for en möre stüne lung rädj slouen önj Kil. Wichtist teema as e energiipolitiik. Deerbai gungt et besuners am e winenergii. Jü schal önj Slaswik-Holstiin, Naasersaksen än Mecklenburg-Vorpommern ma e energiiwiinje kreefti ütbaged wårde. Di slaswik-holstiinsche regiiringsbåås Peter Harry Carstensen wårt sin åmtsmåkere Mc Allister, Scholz, Sellering än Böhrnsen di formadi önjt geestehüs foon e loonsregiiring begrööte. Da ministerpräsidente än boowerbörgermäistere snååke deereefter uk ma nordtjüsche fertreesere foon e wirtschap. Hüsem Informasjoone am fernaierbååre energiie jeeft et foon diling önj aw e ütstaling "new energy" önj Hüsem. Bai e tiind ütstaling hääwe süwat 300 ütstalere üt 15 lönje jare stääse apbaged, am inowatiiwe produkte änj technologiie fortufäären. Et brånjendrååwen ruchtet ham ai bloot tun unernaamen än gemiinde, ouers uk tu priwootmanschne. Da organisatoore ferhoowe foon e 15ste bit tu e 18ste märts mör as 18.000 besäkere. Mör as 70 % san eefter ütkunft foon e organisatoore feekbesäkere. Weesterlönj E Windsurf World Cup aw Sal as jarling foon e 28. Septämber bit tu 7. oktoober. Dåt diiljd e feroontstålter än weensdi ma. Fort 29st tooch wårde bai Brandenborjer Strönj önj Weesterlönj di 18 iir üülje tjüsche wråålsmäister Philip Köster än oudere surfere aw e borde steege. Bai e Super Grand Slam wårde da weedstride waveriding, freestyle än slalom foon e Professional Windsurfers Association Tour ütdreegen. For e waveridere as´r uk e leest säsongstasjoon än deerma uk stää foont benååmen foon e wråålsmäister. Wääder, wååder än moune Diling blaft et di formadi nuch jarst bedaked, ouers ouf tumadi wårde da wulkne maner än di eeftermadi as dan uk e san tu schüns. Et blaft dröög bai temperatuure bit 8 grood. Mjarne dan mönje we en ruchten moien uursdäi fermousem weese. Dan jeeft et sanschin ouer e mååst tid foon e däi än temperatuure bit 11 grood. Di win wait frisch üt et söödweesten. Da näiste biise tunge huuchwååder önj Doogebel hääwe we eeling am 11 minuute ouf soowen än dan wi mjarne di mjarn am fiirng for oocht. Di moune namt ouf. Än tuleest nuch üüs spräkeuurd for diling Di beer wårt sänj, wan di göölbüker kiimen as. En tiinjst foon e FRIISK FORIINING www.friiske.de